產後漏尿點算好?婦科醫生：把握6個月黃金期，先至唔會由「滴答」變「嘩嘩」
「生完BB三個月，一抱起小朋友或者打噴嚏，就會滲尿，好尷尬…」
「以為坐完月就會好，點知BB半歲，反而仲頻密，要長期用護墊頂住…」
呢啲經歷，喺香港好多新手媽媽都唔陌生。有人覺得「當媽就係咁啦」，但事實係：產後漏尿唔係必然，要重視亦可以改善。
盆底肌就好似一張吊網，負責托住膀胱、子宮同直腸，仲幫手控制小便。
孕期壓力：BB一路長大，子宮變重，長期壓住盆底肌，令佢好似皮筋咁被拉鬆。
分娩拉扯：順產時BB經產道，會極度拉伸肌肉;就算係剖腹產，9個月嘅壓力都會令盆底支持力下降。
所以好多媽媽產後咳嗽、大笑、快走時，就會有 壓力性尿失禁。
36歲嘅阿怡，第一胎順產，產後兩個月開始發現「行兩步就會滲尿」。
佢形容：「最驚係去飲同朋友食飯，明明著咗新裙，但一笑就滲，成個人冇曬自信。」
後來喺醫生建議下做咗盆底肌評估，開始電刺激加生物反饋治療，再加埋每日自己做 Kegel 運動。半年後情況明顯改善，佢笑住話：「依家可以同女兒一齊跳繩，再冇漏尿!」
陳慧雯醫生強調：產後42日到6個月係修復最佳時間。早做幹預，事半功倍。
專業評估：檢查盆底肌力有幾多級、左右平衡同耐力，唔好覺得「冇感覺」就跳過。
專科治療：電刺激、生物反饋等無創療程，每次30分鐘左右，每週2-3次。
居家訓練：每日堅持 Kegel 運動，收縮同放鬆 10-15 次一組，一日 3 組，慢慢增加保持時間。
常見誤解
❌ 「等斷奶先做」 → 其實愈早開始愈好，唔會影響母乳。
❌ 「做仰臥起坐就得」 → 反而會加重腹壓，令情況更差。
❌ 「剖腹產就冇事」 → 孕期壓力一樣會損害盆底肌。
❌ 「按摩機=修復」 → 效果有限，唔等於專業康復治療。
溫馨提醒
漏尿唔係「必然宿命」，及早評估同治療，唔單止可以改善尷尬，仲可以 預防日後子宮脫垂同長期失禁。
如果你產後仲困擾緊，不妨搵返正規婦科醫生，睇下自己盆底肌狀況，制訂合適嘅康復計劃。
